«Մեր Մայր Հայաստանն ու Հաղթանակ զբոսայգին» ՍՏԵԼԼԱ ՀԱՄԲԱՐՅԱՆ

Քանաքեռ-Զեյթուն վարչական շրջանի գեղեցիկ վայրերից մեկն էլ «Հաղթանակ» զբոսայգին է, հատկապես փոքրիկների համար այն ուղղակի հեքիաթ է:

Իսկ ի՞նչ գիտենք այս այգու մասին:

Հաղթանակի զբոսայգին իր առաջին այցելուներին սկսել է ընդունել 1950 թվականի նոյեմբերի 29-ից։ Նույն օրն այգում բացվել է Ստալինի արձանը, սակայն 1962 թվականին Ստալինի արձանն ապամոնտաժվել է, և արձանի տեղում տեղադրվել է Արա Հարությունյանի հեղինակած «Մայր Հայաստան» արձանը։ Այն  մարմնավորում է անկոտրում ռազմական ոգու, հայրենիքի պահապան հրեշտակ հայ մոր հավաքական կերպարը։
Մայր Հայաստան հուշարձանի բնորդուհին Եվգենյա Մուրադյանն է:

Նա 17 տարեկան էր, երբ քանդակագործը նկատեց նրան և աղջկա մայրիկին պատմեց իր ծրագրի մասին։ Սակայն մայրը թույլ չտվեց, քանի որ այդ ժամանակ ընդունված չէր երիտաարդ տարիքում բնորդուհի լինել: Պարզվեց Արա Հարությունյանը Եվգենյայի եղբոր ուսուցիչն էր, և Եվգենյան եղբոր հետ այցելեց արվեստանոց:

«Նկարիչը խորաթափանցորեն տեսել և արտահայտել էր այն, ինչ թաքնված էր իմ մեջ, այն, ինչ անհասկանալի էր նույնիսկ ինձ համար»,- խոստովանել է նա։

1970 թվականին հուշահամալիրի շենքում բացվել է Հայրենական Մեծ պատերազմին Հայաստանի մասնակցությանը նվիրված «Մայր Հայաստան» զինվորական թանգարանը: 

1958 թվականին սկսվեց «Արևիկ» արհեստական լճի կառուցումը, որը կրկնում էր Սևանա լճի ձևը:

Այժմ Հաղթանակի զբոսայգին թե՛ մեծերի, թե՛ փոքրերի սիրելի վայրերից մեկն է Երևանում, ուր առավոտյան կարելի է մարզվել, երեկոյան լիցքաթափվել՝ Արևիկ լճում նավարկելով կամ ուղղակի պտտվող անիվ կառուսելից բացվող աննկարագրելի տեսարանը և մայրամուտը վայելել, կամ էլ վերադառնալ մանկություն, ու ավտոդրոմ նստել:

 Նյութը պատրաստեց Ստելլա Համբարյանը:

Հոդվածը գրվել է The Voice of Yerevan Community  ծրագրի շրջանակներում: